കേരള ലക്ഷദ്വീപ് മികച്ച ഡയറക്ടറേറ്റ് – റിപ്പബ്ലിക് ദിന ക്യാമ്പിൽ അഭിമാനനേട്ടവുമായി കേരള എൻ.സി.സി

ഈ വർഷത്തെ റിപ്പബ്ലിക് ദിന ക്യാമ്പിൽ കേരള എൻ.സി.സിയ്ക്ക് രണ്ടാം സ്ഥാനം ലഭിച്ചു. രാജ്യത്തെ ഏറ്റവും മികവാർന്ന പ്രവർത്തനങ്ങൾ നടത്തിയ ഡയറക്ടറേറ്റിനുളള ട്രോഫി സ്വന്തമാക്കി കേരള ലക്ഷദ്വീപ് ഡയറക്ടറേറ്റ് ചരിത്രം കുറിച്ചു.

കഴിഞ്ഞ വർഷം നടന്ന എൻസിസിയുടെ ഓവറോൾ പ്രകടനത്തിന് അഖിലേന്ത്യാതലത്തിൽ കേരള എൻസിസി ഇത്തവണ നാലാം സ്ഥാനവും സ്വന്തമാക്കി. 2023-ലെ പതിനൊന്നാം സ്ഥാനം മെച്ചപ്പെടുത്തിയാണ് കേരളം തിളക്കമാർന്ന ഈ നേട്ടം കൈവരിച്ചത്. ശ്രദ്ധേയമായ പ്രകടനം കാഴ്ചവച്ച് സംസ്ഥാനത്തിന് അഭിമാനമായി മാറിയ കേഡറ്റുകളെ ഫെബ്രുവരി അഞ്ചിന് ആദരിക്കും. വൈകിട്ട് അഞ്ചു മണിയ്ക്ക് പാങ്ങോട് കരിയപ്പ ഓഡിറ്റോറിയത്തിൽ ആണ് അനുമോദന ചടങ്ങ് നടക്കുന്നത്.
2023 ഡിസംബർ 30 മുതൽ 2024 ജനുവരി 29 വരെ ഡൽഹിയിലായിരുന്നു റിപ്പബ്ലിക് ദിന ക്യാമ്പ്. കേരളത്തിൽ നിന്ന് പങ്കെടുത്ത 124 കേഡറ്റുകളും വിവിധ മത്സരങ്ങളിൽ മികച്ച പ്രകടനമാണ് കാഴ്ചവച്ചത്. വിവിധ മത്സരങ്ങളിൽ ഇന്നവേഷൻ വിഭാഗത്തിൽ ഒന്നാം സ്ഥാനവും ബാലെയ്ക്ക് രണ്ടാം സ്ഥാനവും ഗ്രൂപ്പ് ഡാൻസിന് മൂന്നാം സ്ഥാനവും കേരളത്തിന് ലഭിച്ചു. സർജന്റ് ചിൻമയി ബാബു രാജ്, ജൂനിയർ ആർമി ബെസ്റ്റ് കേഡറ്റ് മത്സരത്തിൽ വെളളി മെഡൽ നേടി. കോർപ്പറൽ ആകാശ് സൈനിയ്ക്ക് അശ്വാരൂഢ മത്സരത്തിന്റെ ഹാക്‌സ് ഇനത്തിന് വെങ്കല മെഡൽ ലഭിച്ചു. സർജന്റ് സെയിദ് മുഹമ്മദ് ഷാഹിൽ എൻ. കെ സീനിയർ നേവൽ ബെസ്റ്റ് കേഡറ്റിനുളള വെങ്കല മെഡൽ കരസ്ഥമാക്കി. ഡയറക്ടർ ജനറൽ എൻ.സി.സി ന്യൂഡൽഹിയുടെ പ്രത്യേക പരാമർശത്തിന് രണ്ട് കേഡറ്റുകൾ അർഹരായി.